A madrugar, que estamos de vendima!

Outro ano máis aquí estamos vendimando como posesos, e é que hai que recoller as uviñas para poder facer ese Ribeiro tan senlleiro, que vos gusta tanto a todos! Cunha saúde estupenda dos racimos e unha climatoloxía tan boa… que máis podemos pedir?!

O pase de diapositivas require JavaScript.

Comezamos recollendo as uvas de treixadura, pois son as que mellor maduración acadaron e as que temos que tratar con máis agarimo para elaborar con elas a edición limitada de Porta da Raíña. Logo seguimos recolectando as uvas de Godello e Albariño, que certamente atopánse nun estado de acidez e azúcres moi adecuado, grazas ao que contamos con que o Senlleiro 2014 sexa moi equilibrado.

E rematamos a vendima un ano máis vendimando o tinto! Mencías, Brancellao e os últimos en chegar as nosas viñas, Sousón e Caíño, todos coa lixeira sobremaduración que todos os anos agardamos para conferirlle eses aromas de regaliz ao noso viño Rechamante, un tinto das montañas do Ribeiro!

E para a semana santa, unhas “torradas de leite”.

Esta sobremesa tradicional elabórase dende o século XV para aproveitar o pan duro que se deixaba amolecer no leite para poder aproveitalo. Era un doce humilde, que pola súa consistencia axudaba a encher o bandullo e evitar así a tentación de consumir carne en coresma. Podíanse elaborar de moitas maneiras, con viño, con mel, mesmo con auga se chegaban a enchoupar se a economía familiar andaba moi xusta.

Aquí presentámosvolas da maneira máis coñecida en todos os fogares, con leite, ovo, azúcre e canela.

TORRADAS DE LEITE

Ingredientes: Pan duro, leite, ovos, azúcre, canela en rama e en pó, e aceite de oliva.

O pase de diapositivas require JavaScript.

Preparación:
Cortamos o pan en rebandas grosas de dous ou tres centímetros, metémolo nun cacharro fondo e cubrímolo co leite para que amolezan ben. Un truco para que quede máis saborosas é cocer o leite cunha ramiña de canela e unha cullerada de azúcre, e unha vez frío enchoupamos ben o pan.
Batemos os ovos e vamos pasando as rebandas empapadas de leite. Ó mesmo tempo vertemos o aceite de oliva nunha tixola e pómola ó lume. Cando o aceite estea ben quente comezamos a fritir as rebandas ata que queden douradiñas.
Apartámolas a un prato ou unha bandexa sobre papel absorvente para evitar o exceso de aceite.
Por último engadímoslle o azúcre e a canela, e a comelas!!

Receita de temporada: Orellas de Entroido!

“Un Entroido sen os seus típicos doces non seria un autentico Entroido”. Isto dedúcese da grande demanda e éxito que teñen estes exquisitos doces propios da nosa cultura durante esta época festiva, ou tamén, por que non, en calquera outro momento que nos praza. Cada comarca outórgalles unha denominación propia ou varíanlle os ingredientes pero sen dubida son estes os que aportan a nota de sabor a Don Carnal -extraído do artigo As sobremesas do Entroido de Vieiros da Escola-.

ORELLAS DE ENTROIDO

orellas entroidoIngredientes para 12 persoas:
1 quilo de fariña de trigo
4 ovos
1 litro de aceite de oliva
2 iogures naturais
250 gramos de manteiga ou manteca de cerdo
Unhas gotas de esencia de anís
2 culleradas de licor de anís ou augardente
Unha pizca de sal
250 gramos de azúcre
Azúcre glass para espolvorear
Raiadura de un limón ou laranxa
1 vaso de auga morna

Preparación:
Nun bol grande engadimos a auga morna, a sal, a manteiga previamente derretida, a raiadura de limón ou laranxa, os iogures, o azúcre, o anís e os ovos. Batemos ata que nos quede unha crema sen grumos. A continuación engadimos a fariña de trigo pouco a pouco e amasamos suavemente ata que quede unha masa grasa e suave de traballar.
Deixamos repousar a masa por unha hora, logo pouco a pouca imos sacando boletes do tamaño dunha noz e estirámola co rodillo ou cunha botella, dándolle forma as orellas. Un pequeno truco para que non se pequen e sexa máis sinxelo o estirado é untar de aceite, e non de fariña, o rodillo. Recorda que podes deixar a masa o máis fina posible para que estexan crocantes, pero iso xa dependerá de como che gusten a ti!
Quenta unha tixola ó lume con abundante aceite de oliva e engade un anaco de masa para saber cando está o aceite listo para comezar e fritir. Frite as orellas polos dous lados ata que estexan douradas, retiraas a un prato con papel de cociña para que absorva o exceso de aceite e por último engade o azúcre glaseado con anís, ou mezclado con canela en pó que tamén están boísimas!

Bo proveito e feliz Entroido!